Фасолевы суп — сялянская кулінарная рапсодыя, якую звычайна чуваць з надыходам першых халодных вечароў

Са з’яўленнем супермаркетаў, удасканаленнем лагістычных маршрутаў па ўсім свеце, развіццём сельскагаспадарчых тэхналогій і харчовай прамысловасці мы, здаецца, атрымалі поўную кулінарную свабоду. У любы час можам набыць любыя прадукты — свежыя, замарожаныя, кансерваваныя. Але мне, чалавеку, які так і не адарваўся ад агарода продкаў (хоць і жыву ў мегаполісе 13 гадоў), падабаецца прытрымлівацца сезоннасці на сваёй кухні.

Таму да халадоў пра фасолю я ніколі не ўспамінаю. Гэта для мяне прадукт выключна на восеньска-зімовы перыяд. Сытны, у добра звараным булёне. Фасоля (ці, як кажа старэйшае пакаленне ў нашых палескіх вёсках, «пасоля») грэе не толькі цела, але і душу. Чым? Ды хоць гісторыямі маёй бабулі пра тое, якімі няпростымі ў плане ежы былі пасляваенныя гады без хлеба і без мукі. А вось фасоля — на кожным агародзе, яе і елі.

Вам спатрэбіцца:

♦ фасоля — 300 г

♦ свініна на костцы — 400 г

♦ бульба — 5—6 шт.

♦ морква — 1 шт.

♦ цыбуля — 1 шт.

♦ соль, лаўровы ліст, любімыя спецыі на смак

Для прыгатавання трады­цыйнага фасолевага супу мы загадзя замочваем бабовыя ў вадзе на некалькі гадзін (можна на ноч). Гэта дазволіць скараціць час варкі. Пасля зліваем ваду. У каструлю кладзём фасолю і мяса, заліваем па новай і ставім на пліту. Даводзім да кіпення, здымаем пену, дадаём лаўровы ліст і любімыя сухія спецыі. На невялікім агні варым 1,5 гадзіны. Паралельна чысцім бульбу, моркву і цыбулю, наразаем іх. Можна крыху абсмажыць на сметанковым масле, але можна і прапусціць гэты крок — каму як падабаецца. Дадаём у суп гародніну, солім і працягваем варыць яшчэ каля 30 хвілін. Падаваць на стол, прапанаваўшы дамашнім лусту чорнага хлеба і часнок.

Источник СБ.

Читайте ndsmi.by в социальных сетях: "ВКонтакте" , "Одноклассники", "Фейсбук", instagram, twitter, Telegram